有兩樣嘢老婆係唔會陪我去的，一係鰻魚飯，二係錢湯。錢湯當然係正嘢，尤其是天寒地凍時，浸完成個人暖到入心。我知，一泊二食私人風呂ichiban ，但又唔想book 間太貴嘅酒店。而老婆皮膚較薄不能經常浸浴，所以呢個活動我一個人去就好了。
除了覺得私人風呂頗貴，我認為錢湯先至係古早、接地氣、庶民風格的。個人是比較喜歡接地氣的東西，不俗氣便可。
典型的錢湯特式係男左女右，入口處中間會有個收銀員老闆娘。入內係衣帽間，敞開道門就係澡堂，中間一道牆分隔男女澡堂，那牆不到頂的，所以係會互相聽到那邊發出來的聲音。
澡堂盡頭有典型的一幅過跨越男女湯的富士山壁畫，係我最喜歡的部分，實在太古早味了。有些富士山壁畫係鬼斧神工，有些卻很樸素簡約，兩者都很喜歡。泡錢湯要講緣份，離酒店不能太遠，因為唔會特登坐車去泡錢湯。幸好我住的酒店8分鐘步程有兩間，就可以兩間試勻。
店不可貌相，以為門面型果間好似好正咁啦，設施竟然不及蛇骨湯。最過份係個富士山壁畫，竟然手多多畫左個坐掃把嘅哈里波特兜緊富士山，咩事呀？反而個蛇骨湯，水是帶黃的真地底溫泉水，有室內湯之餘，仲有露天風呂，勁！店不可貌相。
之但係，當我在蛇骨湯同班男人各自洗澡時，特然有個阿姐由後門入來，阿姐似乎見盡大蛇小蟲，如入無人之境咁做自己野（執捨工作），如事者三分鐘內在男人堆中完成佢要做嘅嘢。滴汗。
沖完、泡完、要再沖多一次身，才進入更衣間抹身再著衫。期間收銀老闆娘走左入來，在梳妝檯上開箱取錢（風筒係投幣式的）雖說老闆娘也見盡大蛇小蟲，但…..那梳妝檯的高度是及腰的，佢取錢時手的高度剛好差不多及腰，實在令男士尷尬無比。而我剛好站在梳妝檯附近抹身，滴汗之餘也下意識地轉身避一避，唯有把屁股朝向老闆娘。呢d 體驗咪係我所講嘅「接地氣」、「庶民風格」囉….
圖片來源｜Instagram
蛇骨湯
地址| 東京都台東区浅草1-11-11
電話| 03-3841-8645
網址| http://www.jakotsuyu.co.jp/
營業時間| 13：00～24:00 (每周二休息)
Google Map|
